《我是旅行嘉》- 英倫風情

才不過是晚上六點多七點,但係整條街已經黑哂,再加上寒冷嘅天氣,真係唔願出去食晚飯,於是諗住喺附近行吓,是但搵啲嘢食就算。

由酒店行出嚟上咗條斜路轉右,條街當然都係黑萌萌,不過竟然俾我發現一點特別光猛,而且門口仲有人群添,以我搵食靠人龍嘅習慣,梗係第一是時間就行埋去啦!

佢叫做Worlds End,由門口望入間鋪頭,見佢人頭湧湧。終於俾我哋逼到入去,都擔心有冇位㗎,原來人多嗰邊係酒吧,而另外一邊餐廳,坐低飲杯啤酒,再等一陣已經有位。

坐低之後一睇個餐牌,非常之合心意,但係飲咗杯啤酒之後又唔係好肚餓,再望吓隔離左右啲食物,碟頭都非常之大,於是叫咗一碟steak and ale pie試吓佢嘅水準先。

好味,真係好好味,入邊嘅牛肉仍然juicy。兩個人食一份,都真係好飽,真係唔明隔離嗰啲鬼妹點可以一人食1分,仲一人飲杯大啤!

之後都叫咗個甜品chocolate fudge cake,嚟到英國唔食甜品係最大嘅損失。佢呢個朱古力蛋糕絕對冇令我失望。

埋單兩個人25鎊維起港幣$250,好似唔係好貴,但係唔好忘記我哋其實只係叫咗一人份,兩個人分。不過喺歐洲旅行係要有心理準備隨便食乜都三幾百蚊㗎。

第一餐就咁正,係一個好嘅開始,希望蘇格蘭旅途繼續愉快。

#正文社旅遊書 #我是旅行嘉 #英倫風情 #何嘉麗callmegaga #Scotland #蘇格蘭 #WorldsEnd