《我是旅行嘉》- 英倫風情

倫敦有一條非常之著名嘅街道,如果你冇行過,就真係好似冇去過倫敦一樣,叫做牛津街Oxford Street。去Oxford Street非常方便,因為由地鐵站一出就係。

咁多年來,牛津街都係咁繁華,當我人在英倫嘅時候,冇乜特別嘢想買,淨係想去睇吓有冇啲Vintage T恤可以買下,於是我就走咗去HMV。

去到HMV嘅門口見有條長長嘅人龍,乜英國嘅唱片業仲咁興盛咩!睇真啲發覺排緊隊嘅全部都係年紀大過我嘅Auntie ,心諗有乜嘢搞作呢。唔理住先啦,反正英倫音樂未必關我事㗎,於是我入去shopping。睇吓睇吓啲T非常之開心,全部係我嗰個年代嘅T恤,買哂就真係破產,正在諗緊買邊件嘅時候,突然聽到後邊一陣喧鬧,轉頭一睇原來明星到,再睇真啲👀嘩,竟然係佢Cliff Richard!終於明白點解排緊隊嘅係嗰個年齡層,原來佢出碟有簽名會。

我大聲講From Hong Kong,佢即刻拎過嚟同我揮手,其實我唔係佢嘅fans,不過對於香港50、60、70年代嘅人嚟講,佢絕對係頭號偶像!同佢揮完手之後,我竟然懵下懵下咁行咗出去HMV,乜嘢都冇買。

唔緊要啦,反正成條牛津街咁多嘢好行,買唔到好嘢,都會食到好嘢嘅!下一站Harrods。

#正文社旅遊書 #我是旅行嘉 #英倫風情 #何嘉麗callmegaga #倫敦#OxfordStreet #牛津街 #HMV #CliffRichard