《我是旅行嘉》- 英倫風情

今朝一早就由愛丁堡搭火車去倫敦。車飛就梗係一去到愛丁堡就行去火車站買定啦。不過其實班火車都唔係好滿,所以現場買都應該買到,不過如果到時真係買唔到你唔好賴我喎!

查清楚月台號碼同埋月台位置之後,就喺火車站食個早餐。人哋連個包裝都咁溫馨可愛,笑住同你一齊迎接新嘅一天。

我搭嘅係Virgin Trains嘅列車,佢講話有Wi-Fi嘅,仲話”Free WiFi now a standard”,喺張飛上邊亦都確實係有一個密碼俾你,一刮就出現。但係坦白講我由上車嗰刻,到落車都接唔上佢個Wi-Fi。

我隔離嗰個外籍婦人就真係好有耐性啦,係咁打電話同Virgin個客戶服務熱線傾計,傾足全程,我就冇佢咁好氣,睇怕佢係想搵人解悶啫。

既然上唔到網,不如坐低買返支可樂歎下我自己由香港遠道帶來嘅齋雞粒冇咁嬲啦。

倫敦,我嚟緊啦。

#正文社旅遊書 #我是旅行嘉 #英倫風情 #何嘉麗callmegaga #Scotland #蘇格蘭 #愛丁堡 #VirginTrains