《我是旅行嘉》- 中亞之旅蒙古國 (7)

《我是旅行嘉》- 中亞之旅蒙古國 (7)

蒙古嘅沙漠,確實一望無際,四野無人,所以當遇到一個小鎮嘅時候,就會入去補充下物資。不過今次要去買嘢嗰個唔係我,而係我哋美麗而年青嘅導遊小姐,咁既然去到咯,我都落車八下啦。

你唔好以為沙漠小鎮嘅超級市場冇乜嘢買。基本嘅日用品,同埋所謂嘅奢侈品,即係外來汽水等等,數起上嚟都唔少種類。

等我睇埋個價錢先。細支美極要3000 圖格里克,當地牌子嘅番茄醬都係二千幾圖格里克,而最貴嘅就係蜜糖啦,要二萬幾圖格里克。(圖格里克係蒙古幣,一美元大概等於2500圖格里克),咁計落又唔算貴。而導遊小姐請我食嗰支雪條都係港幣幾蚊雞,好唔好食都費事講啦,人哋盛意拳拳唔通我拒絕佢咩!不過我食之前,都目測過支雪條,見佢冇變形,而食完之後都冇肚痾。

成個超市最吸引我嘅地方,就係佢個收銀機!冇錯,收銀機係廢嘅,連條電線都未插,真正嘅收銀機係一個四方盒,係好隨意咁將收到嘅錢就咁掉落個盒度。冇分類、冇疊好、冇紮起!究竟係蒙古人對錢銀豁達,定係俾風沙吹到系統混亂!

#正文社旅遊書 #我是旅行嘉 #中亞之旅 #蒙古國 #成吉思汗#Dalanzadgad #南戈壁 #大漠中的超市