《我是旅行嘉》- 中亞之旅蒙古國 (5)

《我是旅行嘉》- 中亞之旅蒙古國 (5)

喺蒙古嘅沙漠,如果你係堅持要住酒店嘅話,就真係唔使去啦,因為我唔肯定有冇酒店或者旅館,就算有都係好少,而且好遠,所以基本上你唔去就罷。咁你可能問如果唔住旅館或者酒店住乜嘢啊?嚟到蒙古就梗係住蒙古包啦!

我去之前已經為自己做好晒心理預備,知道蒙古包嘅設施唔方會好齊全。總之能夠應付生活基本需要我就夠。住嘅第一間蒙古包,入面確實冇乜特別嘅設施,有床、小茶几,同埋一個可以生火嘅炭爐。咁你話乜唔係套房咩!喺蒙古國,有套房嘅蒙古包非常之少,而且超級昂貴!咁沖涼點算呢!佢係集中喺一個地方去洗手間同埋沖涼嘅。不過你亦都要有心理準備唔可以好似喺香港咁辰時卯時都可以走去沖個熱水涼,日落開始啦,就會有熱水涼沖啦,因為佢哋係用太陽能,亦都好懂得善用能源,所以有太陽嘅時候,佢哋係唔會隨便開燈同埋發電嘅。

另外起居飲食,就有一個廚房蒙古包,入到去喺唔同嘅時間有唔同嘅食物,當日我係早上到,所以就有早餐食,一般蒙古包都係包早晚餐嘅。講真大漠咁浩瀚,如果佢哋唔包食,真係唔知去邊度搵嘢填肚啦。

#正文社旅遊書 #我是旅行嘉 #中亞之旅 #蒙古國 #成吉思汗 #蒙古包#Dalanzadgad