《我是旅行嘉》- 中亞之旅蒙古國 (29)

喺蒙古國嘅沙漠地帶遊走,食物不缺,但係講到美味,就真係差好遠。所以由大漠一返到烏蘭巴托,第一件事就係尋找美食。最後我揀咗Silk Road Bar & Grill!

雖然佢係晚上比較熱鬧,但係我冇諗過去同蒙古人hea,我選擇咗去食午飯。非常清靜,因為佢價錢唔算便宜,所以並唔係一般打工階級可以嚟食晏嘅地方。

睇睇菜牌,個樣都幾齊整。睇咗一輪菜牌之後我揀咗牛扒,因為之前喺沙漠食牛,經驗太差,希望呢度可以挽回蒙古食牛嘅小小信心。當然佢並唔係禾牛,至於係咩牛我就問極都問唔出個所以然。

食物上枱各樣都幾齊整,而其中麵包竟然有香草牛油俾我,係有啲意外驚喜嘅。啤酒清清地都唔錯,件牛扒都算及格啦。

喺蒙古嘅沙漠食咗咁耐只供充飢嘅食物,依家有返啲有調味嘅,已經算係天堂。

 

#正文社旅遊書 #我是旅行嘉 #中亞之旅 #蒙古國 #成吉思汗#ChanggisKhan #SilkRoadBar&Grill