《我是旅行嘉》- 中亞之旅蒙古國 (25)

去旅行,有陣時自己都要識走位。唔好以為去到蒙古就一定要住蒙古包,都要睇天氣同埋位置而定。就好似今次我住入咗呢一個庫蘇古勒湖,一早聽人講湖邊係會涼啲,而我哋去嘅季節亦都係已經初秋,所以天氣自不然凍。

其實之前已經住過一兩晚蒙古包係要點炭瞓,但係半夜都要起身加炭,如果唔係到兩點鐘倒已經好凍,試過有一次着埋羽絨大褸同埋羽絨褲至瞓得着。所以係嚟呢個湖之前,我哋已經決定咗今次唔住蒙古包,而係住別墅式小屋。你唔好以為別墅好巴閉,不過係一間木屋,但係就比蒙古包密實,冇咁多入風嘅機會。

其實一間別墅仔喺湖邊,真係幾雅致怡人㗎。又咁啱我哋係季尾,所以遊客亦都唔多,特別清靜。其實果晚我都有諗過係唔係要住返蒙古包呢,因為就嚟要返返烏蘭巴托,之後都唔知幾時至有機會再瞓蒙古包,不過,既然訂咗別墅就算啦。

第二朝,當我喺度食住豐富嘅早餐嘅時候,聽見個導遊同個司機講,尋晚凍到飛起嘅時候,我就覺得我嘅決定真係非常之正確。重複一次,出外旅行,唔可以死牛一邊頸,乜嘢都要靈活處理呀。

 

#正文社旅遊書 #我是旅行嘉 #中亞之旅 #蒙古國 #成吉思汗 #蒙古最北 #木倫 #KhovsgolLake #庫蘇古勒湖 #遊湖 #蒙古包 #別墅式小木屋