《我是旅行嘉》- 中亞之旅蒙古國 (24)

嚟到蒙古國北面咁多日,終於要遊一遊佢著名嘅庫蘇古勒湖。遊湖當日天氣唔算好,海面有風浪,泛起微波,但係對我地去慣海灘玩嘅人來講,唔算係乜嘢。

我哋好輕鬆咁樣行去湖邊,正想跳上隻船仔嘅時候,我哋個導遊竟然有啲怯。佢見我地好輕鬆咁樣走上隻船度,又喺船邊行來行去,佢不停咁叫我地要小心啊!

其實隻船對我哋嚟講,就好似佢只馬一樣,我騎上馬嘅時候有啲怯,佢叫我唔使驚!喺呢隻船上邊我走來走去,輪到我哋叫佢唔使驚喇。

不過佢哋唔係好熟水性,雖然我都唔識游水,但係着咗救生衣就冇有怕啦!我見佢面青青咁坐喺隻船中間郁都唔敢郁,就諗起我自己騎馬嘅時候嗰個樣!

冇幾耐就過到對岸,係一個非常之原始嘅山林,俾庫蘇古勒湖圍繞。除咗見到好多羊之外,就係滿山嘅黃葉。山勢唔算崎嶇,亦都唔斜更加唔高。沿途亦都見到唔少敖包,七彩艷麗。好悠閒!唔覺唔覺兩個鐘頭就過去喇!

 

#正文社旅遊書 #我是旅行嘉 #中亞之旅 #蒙古國 #成吉思汗 #蒙古最北 #木倫 #KhovsgolLake #庫蘇古勒湖 #遊湖