《我是旅行嘉》- 中亞之旅蒙古國 (23)

今次除咗有得騎馬之外,牧馬人仲招呼我去佢嘅帳幕(Ger)度坐。帳幕唔算大,俾我沿途住嘅仲細,佢呢個應該係我平日見嘅二人帳幕。但係麻雀雖小五臟俱全。

門外已經見到有微波接收器,同埋太陽能板,呢D係而家牧民嘅基本裝備,入到去跟佢哋嘅風俗順時針而行,即係由帳幕嘅左手邊睇起,第一件見到嘅物件係馬鞍,呢件係牧民家庭嘅重點標誌,跟住就係男主人嘅範圍,基本上係一張凳仔同一塊地,再前望就係兩個半身櫃,用嚟收藏衣服同埋貴重物件,櫃頂有衣車、電話同埋電視。衣櫃隔離就放咗兩支長槍,無錯佢哋仍然會打獵為生嘅,跟住就係一張床,有客嘅時候亦都會招呼我哋上去坐。然之後去到接近門右邊就係廚房。

帳幕嘅中間就有火爐,旁邊有一張枱,上面擺滿招呼我地嘅乳酪同埋茶。牧馬人誠意拳拳倒咗一碗粉紅色嘅茶俾我,我接過之後飲咗一啖!咦,淡淡地,幾好味喎。導遊話係樹皮㷛牛奶,明明係奶,不過佢哋都係叫佢做茶。

坐咗一陣竟然唔見咗屋主,原來佢走咗出門口,同個孫女玩!

回程嘅時候導遊話俾我哋聽,過埋呢幾日,牧馬人嘅帳幕亦都會拆,然後就會南遷,因為天氣開始凍啦,住唔到Ger。我話咁一年四季走來走去,唔辛苦咩,導遊話,佢哋係依照大自然嘅規律而生活,一啲都唔覺得辛苦。我哋城市人成日話要回歸大自然,但係又有幾個可以好似蒙古牧馬人咁順應天意!

 

#正文社旅遊書 #我是旅行嘉 #中亞之旅 #蒙古國 #成吉思汗 #蒙古最北 #木倫 #KhovsgolLake #庫蘇古勒湖 #騎馬 #飛奔大漠中 #牧民的Ger包