《我是旅行嘉》- 中亞之旅蒙古國 (21)

喺烏蘭巴托休息咗一晚之後,第二朝就搭10點鐘嘅匈奴航空(Hunnu Air),去位於蒙古西北邊疆嘅庫蘇古勒省嘅最大城市木倫(Murun)。再坐大概5小時車,經過260公里嘅路,去目的地庫蘇古勒湖(Khovsgol Lake)。

庫蘇古勒湖係中亞細亞最深嘅淡水湖,大概儲有世界1.5%嘅淡水。佢靠近蒙古國和俄羅斯邊界,水域總面積係2,760平方公里,一共有大小96條河流匯入湖中,湖水儲量為3,800億立方米,係蒙古重要的淡水儲備。湖水經過蒙古最大的河流色楞格河,匯入俄羅斯嘅貝加爾湖,最深處可達262.4米,當地人叫呢度做中亞嘅瑞士。

不過,未去到呢個人間仙境之前,先要走過「死亡的幽谷」!正話都講咗啦,車程成五個鐘頭,沿路只有兩邊嘅山景同埋樹木,空氣確實非常清新,可惜,沿途路面失修,凹凸不平,我哋坐嘅小小四驅車,喺呢個一望無際嘅爛路面上行走,真係人生第一次明白顛簸呢個詞嘅意思!

沿途天大地大,眼見一望無際嘅爛路,好擔心架車會死火,不過最後死火嘅唔係架車,係個司機!佢揸得異常小心,即係慢到不能,一來可能佢怕啲道路會整穿佢嘅車底,二來佢都唔係好熟路,不過又有邊個熟路呢!沿途冇路標,司機同個導遊全靠感覺去到目的地,結果喺我第3小時開始發功命令佢加速之後,我哋都要成六個鐘先至去到目的地!真係由天光坐到天黑!

不過去到我哋嘅營地,就乜嘢投訴都冇啦,因為真係好靚。

 

#正文社旅遊書 #我是旅行嘉 #中亞之旅 #蒙古國 #成吉思汗 #蒙古最北 #木倫 #KhovsgolLake #庫蘇古勒湖