《我是旅行嘉》- 中亞之旅蒙古國 (20)

結束南戈壁部份的行程,開始庫蘇古勒湖(Khovsgol Lake)之旅之前,等我同大家介紹一下我南戈壁呢個部份嘅導遊同司機先。

導遊係一個曾經喺外國某NGO做過義工嘅蒙古少女,聽口氣有啲背景嘅,啲英文就比較美國口音,但係都只可以用簡單嘅英文溝通,深少少嘅字都唔識。

佢個人非常之開朗活潑,我第一日見佢成三個幾鐘頭車程都喺度睇書,就問佢讀乜,原來做完我哋導遊之後,佢就要考一個英文試以預備佢去美國留學,佢仲話好深,記唔到咁多,我順手攞嚟睇一睇,仲補咗一句好淺啫,咁就禍從口出,之後,全程我就變咗佢嘅英文老師。

另外就要介紹我哋個司機啦,你唔好睇佢20歲出頭,已經結咗婚仲有個仔添,我問佢做司機好唔好玩呀,佢話都可以生活有餘㗎,聽起上嚟應該唔錯。架車係佢自己嘅,大概五萬蚊港幣,咁聽價錢都知應該係二手嘅,如果你唔熟價錢,都可以睇佢嘅軚盤位置,蒙古國係左軚嘅,但係佢呢架係右軚,因為由日本二手進口。

部車初頭幾好嘅,不過行得後尾,可能喺沙漠入邊食得太多沙,個冷氣就出咗啲問題。不過開窗吹下風都好舒服。

一聲拜拜之後,就結束咗同佢哋嘅幾日友誼,人生就係咁㗎啦,呢幾日日日朝夕相對,一齊食飯,悲喜與共,但係分手之後,就應該冇乜機會再見啦。唔知佢考英文試考成點呢!

 

#正文社旅遊書 #我是旅行嘉 #中亞之旅 #蒙古國 #成吉思汗#Dalanzadgad #南戈壁 #大漠 #導遊 #司機