《我是旅行嘉》- 中亞之旅蒙古國 (2)

《我是旅行嘉》- 中亞之旅蒙古國 (2)

由香港飛去蒙古國,航程一啲都唔長,而香港同蒙古亦都冇時差。4小時40分就由香港飛到去蒙古國嘅成吉思汗機場,冇錯,呢個係我喺蒙古國第一次接觸成吉思汗呢個名,不過唔使擔心,陸續有嚟。

去到蒙古第一件事就係去找換店換蒙幣 – 圖格里克(一美元大概等於2500圖格里克),喺機場出咗禁區之後,行上樓上,就有銀行可以換錢。雖然當日我去到係星期日,但係佢哋都開半日工嘅。至於個兌換率好唔好,我真係唔知啦。反正亦都只可以喺呢度換錢!

有咗當地通行嘅貨幣之後,就行過隔離買電話卡,我當時喺香港就搵唔到蒙古電話卡嘅,咁所以去到蒙古至買,買嘅時候佢話成個蒙古國都用得,但係經驗話俾我聽,去到沙漠就唔用得!

都可以想像嘅,嗰啲地方天大地大,又唔係多人用,如果起咁多個發射塔,一來污染環境,二來收唔番成本,所以人煙稀少,要長途跋涉先至到嘅地方,就真係一世唔收!我意思係話一世都收唔到!至於城市,一般都接收得好好。

好啦,有錢洗,有通訊工具,我嘅蒙古旅程正式開始。

#正文社旅遊書 #我是旅行嘉 #中亞之旅 #蒙古國 #蒙古航空 #烏蘭巴托 #成吉思汗機場 #蒙幣圖格里克 #電話咭