《我是旅行嘉》- 中亞之旅吉爾吉斯坦 (7)

吉爾吉斯的伊塞克湖沿岸有好多沙灘,但係都係人造沙灘,不過並唔影響弄潮兒嘅興致。當我地由酒店行出嚟,諗住去沙灘行下嘅時候,見到當地嘅導遊換哂泳衣,然後佢好似好唔明白咁問乜你地冇帶泳衣咩!嗄,我都唔知我哋會住resort!

不過講真就算我有泳衣我都遊唔到水,唔係識唔識游水嘅問題,而係啲水太凍!我用手掂一掂都即刻縮起,唔係好明解啲人仲可以落水游得咁興奮。

不過喺呢度游水又真係好有型,因為背後就係天山!天山喎,種雪蓮嘅地方喎,竟然俾佢back住你游水,而游緊嘅就係天山嘅雪溶出來嘅水,你話係唔係超型呢!

去到沙灘邊,我除咗對鞋學人行吓沙灘啊!可惜,人造沙始終唔及天然沙咁幼細。真係好拮腳!

不過當我喺度嘈喧巴閉嘅時候,其他人就不知幾咁享受!聽講吉爾吉斯係俄羅斯嘅後花園,好多人喺假期嘅時候都會揸車過嚟嘆返三幾日,淨係做佢哋生意都夠食囉。

#正文社旅遊書 #我是旅行嘉 #中亞之旅 #吉爾吉斯坦 #伊塞克湖 #俄羅斯嘅後花園 #天山 #天山雪蓮