《我是旅行嘉》- 中亞之旅吉爾吉斯坦 (16)

《我是旅行嘉》- 中亞之旅吉爾吉斯坦 (16)

喺吉爾吉斯,我第一次領教到乜嘢係夜不閉戶。所講嘅係我地入住嘅旅館Ashu。只有幾座兩層高嘅平房,但係已經可以住唔少嘅旅客。當日我哋入住嘅時候咁啱有一班德國人,佢哋浩浩蕩蕩咁十幾架四驅車殺到,我見到嘅時候,心諗,死啦會唔會好嘈。結果當然係寧靜非常啦。首先,嗰度地方大,第二德國人係非常之自律嘅。佢哋第二朝走嘅時候,你完全唔知道咁滯,真係嘈都唔嘈一下!

好啦,講返間旅館,攞房嘅時候淨係俾個Number,咁我哋問鎖匙,佢哋話冇鎖匙㗎。咁我以為鎖匙喺房啦,點知入到去都冇,只係喺門後面有個扣,即係話如果你喺間房入面你就可以搵個扣叫做鎖住下間房,如果你離開間房呢,就真係如果有賊嘅話就有冇佢為所欲為啦!

咁佢做得呢個安排,就梗係周圍非常太平啦。房間非常簡單,但係有齊足夠嘅設施同埋獨立浴室,啲水仲係好勁同埋好暖嘅添。趁着食飯之前喺花園走走,見到工人喺度採集香草,原來就係預備緊我哋嘅晚餐,真係現採現煮,非常新鮮。

夜晚黑坐出花園度觀星,成條星河擺喺你眼前,更係難得嘅美景。至於房間入面嘅行李?噢,我真係完全唔記得咗呢啲俗務啦!

#正文社旅遊書 #我是旅行嘉 #中亞之旅 #吉爾吉斯坦 #俄羅斯嘅後花園