《我是旅行嘉》- 中亞之旅吉爾吉斯坦 (15)

《我是旅行嘉》- 中亞之旅吉爾吉斯坦 (15)

今日我哋去行吓吉爾吉斯嘅巴薩(bazzar),亦都即係我哋一般嘅街市。當然去之前要經過一輪塞車,落車之後亦都要排除萬難,行過車群先至可以入到去街市。當時其實已經係黃昏,街市入面好多檔口都收咗,但係依然好多人同車互相爭路!

街市入面一擋一擋,非常整齊,亦都好乾淨,當然當地天氣乾燥亦都有關係。入到去其實好幾區嘅鋪頭都收咗檔,不過依然可以感受到呢個街市如果係開足嘅時候嗰種熱鬧法,因為我都見到書報攤、賣衣服嘅、賣食物嘅、同埋當然更多檔喺度賣緊乾果啦。

街市入面嘅乾果確實比超級市場嘅平,於是我哋都買咗好幾公斤走人,拎到死下死下!不過吉爾吉斯乾燥嘅天氣同香港嘅潮濕原來係有分別嘅,返到嚟,嗰啲乾果入面嘅蟲卵,竟然孵化成為蟲仔!你可能話街市買就梗係咁㗎啦,唔係喎,我喺超級市場買嗰啲,包裝華麗嘅,都孵出蟲仔喎!不過後尾我將佢哋再煮過,然後再放入焗爐咁就一樣食得。

街市入面,好多人都好抗拒被攝入鏡,不過臨走嘅時候比嗰個賣西瓜嘅哥哥逗得我非常開心,佢跳高跳低就係想我幫佢影相,不過我實在太蠢喇,淨係記得幫佢影相,應該拍埋片就真係留下最美麗嘅回憶啦。

#正文社旅遊書 #我是旅行嘉 #中亞之旅 #吉爾吉斯坦 #俄羅斯嘅後花園#Bazzar #吉爾吉斯坦的街市