《我是旅行嘉》- 中亞之旅吉爾吉斯坦 (13)

《我是旅行嘉》- 中亞之旅吉爾吉斯坦 (13)

每一個望落去令人內心震撼嘅地貌,都係大自然嘅侵蝕結果。今次我哋去嘅呢一個地方,係位於伊塞克湖東南方嘅七隻公牛山(Jeti Oguz),顧名思義就係大自然喺一個山頭上邊產生作用,令到佢變出七個山頭。

不過去到你就可以能會數出更多隻牛!冇所謂啦,紅色嘅岩石,先至係佢真正吸引人嘅地方。有人話參觀七隻公牛山最好係傍晚時分,因為夕陽映照落去啲紅色嘅石上面,特別凄美動人。不過當你參觀七隻公牛山嘅同時,亦都會參觀另一組美麗嘅石頭,背後仲有一個浪漫嘅愛情故事,叫做破碎的心,不過呢個破碎的心又要喺早上參觀至靚,唯有取其中庸之道,喺下晝去參觀哂兩個地方喇。

睇七隻公牛石要登高山先至可以一覽全豹,喺公路旁邊就有一條小斜路,行25分鐘就去到山頂,由嗰度望過去七隻公牛山,先至知道咩叫宏偉!

吉爾吉斯嘅天氣非常清爽,行咗20幾分鐘,都只係有微汗,沿途仲不時有當地嘅人騎住馬、騎着驢行過,真係別有一番風味。

夏天嘅時候仲會有好多蒙古包喺附近紮駐,你可以租嚟住一晚咁就可以傍晚影七隻公牛石,早上影破碎的心石啦。

#正文社旅遊書 #我是旅行嘉 #中亞之旅 #吉爾吉斯坦 #俄羅斯嘅後花園 #伊塞克湖 #七隻公牛山 #破碎的心 #JetiOguz