《我是旅行嘉》- 中亞之旅吉爾吉斯坦 (12)

《我是旅行嘉》- 中亞之旅吉爾吉斯坦 (12)

去一個地方旅行,認識當地嘅食物好重要。特別係我咁為食。基本上喺吉爾吉斯呢個旅程,沿途食物非常豐富,而且味道亦都好好。餐餐都有沙律,有主菜有主食,而且份量不少而價錢廉宜。

其中最有趣嘅係一個大型餃子, size等於我哋平日食嘅雲吞四五倍咁大隻,入面塞滿咗不同嘅肉碎,可以係牛,可以係羊,通常都會包埋啲洋蔥、蔬菜,剁剁埋埋再釀入個餃子皮入面,然後好似我哋包雲吞咁將啲餃子皮打成細摺,再拎去煮熟佢。

呢隻巨型餃子可以煎,亦都可以蒸,更有用水煮熟嘅。我食過嘅咁多款,全部都非常可口惹味,如果真係要我揀,我覺得煎嘅最好食,不過真係好大只,我食一個已經飽,但係通常佢預你食成兩三隻,而呢個只係一餐入邊嘅一部份。可以想像去完一次吉爾吉斯,返嚟會肥成點!

呢個係當地人嘅主要食品,亦都反映咗民間智慧:呢個巨型餃子,一來方便攜帶,二來有麵粉有肉有菜,真係為佢哋提供營養充足嘅一餐。

 

#正文社旅遊書 #我是旅行嘉 #中亞之旅 #吉爾吉斯坦 #俄羅斯嘅後花園 #巨型餃子 #為食路上