《我是旅行嘉》- 一千零一夜之旅(5)伊朗的市集

正式開始伊朗之旅。去到德黑蘭嘅時候,已經係中午時分,其實之前都飛咗十幾個鐘,應該都有啲攰,但係可能係呢個地方神秘莫測,個人有啲緊張,亦都因為我哋會去行伊朗市集,所以特別興奮。你知道我係幾咁鍾意行呢啲地方㗎啦。

因為接近伊朗新年,所以市集人頭湧湧,當地導遊吩咐我哋留意下銀包就得,因為都算幾安全。市集入邊嘅物品,真係包羅萬有,我就梗係特別留意食物啦,見到檔檔都有無花果乾,又都係咁上下價錢,於是我叫佢同我秤半公斤,等我以為自己識睇佢嘅價錢牌,於是自己攞咗張紙幣出嚟俾錢佢,佢竟然擰擰頭,睇真尐個價錢牌,再俾,又係錯!結果我打開個銀包任佢攞。

另外我又飲咗杯神石榴汁,當地周街都係神石榴汁,而且真係純果汁,唔似香港咁溝到淡晒,一杯亦只係100,000里亞爾,唔日日飲番杯就真係蝕。伊朗人成日都飲神石榴汁,唔知佢哋啲血管係唔係好通嘅呢。

 

#正文社旅遊書 #我是旅行嘉 #波斯之旅 #伊朗 #一千零一夜之旅 #一千零一夜 #文明古國 #伊朗的市集 #里亞爾 #Rial #神石榴汁 #Pomegranate