《我是旅行嘉》- 一千零一夜之旅(2)

伊朗天氣非常之熱,行到一身汗,能夠飲番啖啤酒,真係消暑解渴,可惜呢件事係唔可能嘅。

其實伊朗有一個地方叫做色拉子, Shiraz,就係釀Shiraz葡萄酒嘅嗰種葡萄嘅產地,但係偏偏伊朗唔可以飲酒,所以亦都冇得飲紅酒。

咁你話伊朗盛產魚子醬,能夠有杯香檳一齊㗳下㗳下,就最正喇!對唔住,都係唔得嘅。

要記住,喺伊朗飲酒係犯法嘅,所以任何酒精類都唔能夠存在喺伊朗境內。不過佢係有得賣啤酒嘅,仲有好多唔同味道添,不過係完全不含酒精。

於是我就試吓飲個桃味啤酒!結果呀,我覺得比桃味飲品難飲十倍、一啲都唔可以同啤酒拉上關係、更加唔可以算係酒精嘅代替品!一般亦雪得唔夠涷,咁你話暖啤已經咁難飲,仲係仿效啤酒嘅暖啤,可想而知有幾惡哽!

所以喺伊朗,全程我係飲可樂。

 

#正文社旅遊書 #我是旅行嘉 #波斯之旅 #伊朗 #一千零一夜之旅 #一千零一夜 #文明古國 #酒禁禁酒 #啤酒代替品