《我是旅行嘉》- 一千零一夜之旅(18)- 伊瑪目廣場

伊瑪目廣場位於伊朗的伊斯法罕市中心,廣場長500公尺,寬160公尺,規模僅次於北京天安門廣場。係當年薩非王朝國王阿巴斯檢閱軍隊和觀看馬球的場所。原名係國王廣場,伊斯蘭革命後改為伊瑪目廣場。1979年聯合國教科文組織將伊瑪目廣場列入世界遺產。

廣場真係夠大,一邊係女王清真寺,正名係羅德菲拉清真寺,另外一邊就係皇帝清真寺即係阿里卡普宮殿。呢個皇帝好驚人暗殺佢,於是佢個宮殿外邊望好似得兩層,另外一邊睇又好似有五層,其實係有六層嘅,我諗唔單止啲刺客行到頭暈暈,連佢啲衛兵都應該行到亂晒大籠。

唔單止樓層錯亂,佢啲樓梯級都好高,一級等於我哋三級,行完氣都喘埋,要刺殺呢個皇帝都真係要諗過!

不過辛辛苦苦上到去個平台再望出去伊瑪目廣場,又真係非常之宏偉,行到腳軟都值得。

行完咗兩大清真寺之後就係行街嘅時間啦,因為整個廣場四邊圍住嘅建築物嘅地下果層,都係賣各式物品嘅攤檔。最多係食物,另外係頭巾,枱布都唔少,而且價錢唔算貴,有得講價嘅,非常好玩。提多一句,用美金就可以講得平D添啦。

 

#何嘉麗callmegaga #何嘉麗 #出街玩 #伊朗初探 #旅行團 #伊朗文明 #伊瑪目廣場 #羅德菲拉清真寺 #阿里卡普宮殿