喺德黑蘭嘅大街小巷，時時見到男男女女，在鼻上貼上大大的一塊白色膠布，好似去韓國整容嗰啲大媽咁，但係邊有人整容整到慌死無人知周街走㗎！於是我又諗會唔會係佢哋宗教嘅表達方法呢！
但係又真係喺購物商場都見到啲人貼住塊大膠布喺度返工，甚至去到波斯波利斯，即係伊朗其中一個最重要嘅文物，你都會見到喺嗰度負責維持秩序嘅職員，仲係男職員喎，都成個阿凡達咁，貼咗大大一塊白膠布喺個鼻度，當哂冇事咁繼續工作。
終於有一次喺女廁，我有一個機會！當時我俾一群女人圍住我傾計，其中有兩個又係貼咗塊辣椒標咁大嘅白膠布喺個鼻度嘅，我當時其實已經好想問，因為大家傾得好投契，不過我都係驚，怕如果有乜嘢冒犯，佢哋溶咗我都得！所以又冇問。
直至我去到機場嘅免稅品，我終於忍唔住啦，一來呢度係國際機場，應該冇咁驚啩，二來我俾咗單大買賣呢個女仔做，佢應該對我好啲嘅。
點知當我好似好尷尬咁指住佢個鼻，唔知點開口嘅時候，佢就好開心咁話「係呀，我整容啊！削細啲個鼻。」
跟住我都未嚟得切再問落去，佢就將佢以前未整容嘅相俾我睇，嘩，個鼻又真係好大！陰公，俾啲我啦！雖然我覺得佢整容前同整容後冇乜分別，但係我梗係不停咁落嘴頭讚佢啦，所以跟住我問佢幾多錢呀，佢就係咁用個計數機，幫我計番美金出嚟。哦，原來只係美金千二蚊就可以削鼻，真係抵！
我覺得呢度嘅民風好正，整容咪整容囉，駛乜偷偷摩摩唧！又話乜嘢二次發育、又話乜嘢角度問題，你睇吓人哋幾大方！波斯族裔，係有型啲嘅。