《我是旅行嘉》- 一千零一夜之旅(14)- 我是偶像

唔好以為我咁囂張,大大聲封自己做偶像!其實我冇做偶像好耐啦,不過任何一個人去到伊朗,都會成為偶像。

點解任何人去到伊朗都變成偶像呢!咁偶像最常做嘅係乜嘢呢,就係被要求影相啦。伊朗啲人真係好鍾意搵人影相㗎。

你唔好以為自己好靚,或者特別型,亦都唔好以為自己奇怪突出,所以佢搵你影相。總之唔理好醜,只要唔係佢哋D樣嘅人,佢就會搵你合照,更何況東方面孔係更加稀有!

佢哋仲有一度頂癮,就係佢同你合照佢並唔需要攞返個copy,就係用你部手機影,佢已經好開心!我心諗,咁影嚟做乜呢,自己又冇得睇!

有一次仲好嘢。明明只係要求同個細路女影,點知擺好甫士嘅時候佢阿媽忽然將個BB仔擺喺我大肶上面,即係下圖第一幅,咁於是我就有仔有女,看似非常幸福美滿了。

#正文社旅遊書 #我是旅行嘉 #波斯之旅 #伊朗 #一千零一夜之旅 #一千零一夜 #文明古國 #我是偶像