《我是旅行嘉》- 一千零一夜之旅(13)伊朗的拜火廟

當伊朗仍然係叫做波斯嘅時候,波斯人大部份都信奉拜火教。拜火教同香港都好有關係,淨係講條麼地道你就應該明,此外麼地先生都捐過錢起香港大學,咁你可能話呢個係史前嘅事啦!唔係喎,而家喺銅鑼灣都有一棟建築物係佢哋嘅,門口都有拜火教嘅標誌。

再講一個你哋熟悉嘅人物,佢屋企都係信拜火教嘅,就係樂隊Queen嘅靈魂, Freddie Mercury。

雖然今時今日拜火教徒喺伊朗數目今非昔比啦,但係佢哋依然保持住一個傳說 – 喺亞茲德嘅拜火廟入面,有一個連續燃燒咗1500年嘅聖火。

聽講平日呢個拜火廟就係蚊飛過都聽到嘅,但係因為我哋去嘅時候係新年,所以水洩不通,但係都叫做見過下嗰個燃燒咗千幾年而不滅嘅聖火!當然,今時今日大家會聯想到聖火所在嘅地方嘅地下有天然氣,所以咪可以令聖火不滅囉。

#正文社旅遊書 #我是旅行嘉 #波斯之旅 #伊朗 #一千零一夜之旅 #一千零一夜 #文明古國 #拜火教 #Zoroastrianism #亞茲德 #Yazd #亞茲德嘅拜火廟 #千年不滅嘅聖火