《我是旅行嘉》- 一千零一夜之旅(完)- 哈鳩橋

哈鳩橋(Khajoo Bridge) ,位於伊朗伊斯法罕,由波斯薩非王朝國王阿拔斯二世喺1650年左右,喺一座舊橋之上興建,連接北岸同埋河對岸嘅拜火教區。

佢唔單只係橋梁同水壩,同時亦係公眾集會的場所。喺建築物嘅中心,有一個涼亭,阿拔斯國王曾經坐喺呢度欣賞美景。

呢條橋亦稱為24孔橋,因為佢一共有24個拱門,夜晚燈光反映到水面嘅時候,就好似一個個圓洞一樣,非常美麗。可惜因為有一年伊斯法罕發生旱災,當局就將呢條橋下面嘅水引咗去灌溉,自此之後呢條橋下面就一直都只係旱地。真係冇嘢係永恆!

正如一千零一夜嘅故事都有講完嘅一日,一千零一夜之旅亦都唔例外,而我呢個專欄亦都告一段落。今日係我喺正文社嘅最後一篇遊記。

多謝正文社,多謝編輯,多謝幕後工作人員嘅支持同埋網友嘅閱讀。特別多謝厲河!我祈望我哋會再見,正如我一直相信哈鳩橋會有一日回復當年水波灧瀲一樣!

#何嘉麗callmegaga #何嘉麗 #出街玩 #伊朗初探 #旅行團 #伊朗文明 #哈鳩橋 #KhajooBridge #24孔橋